Կլոր սեղան նվիրված Գյուղաբնակ կանանց միջազգային օրվան

«Կանանց քաղաքական լիդերություն. գենդերային հավասարության և մասնակցային ժողովրդավարության առաջմղման հեռանկարները Հայաստանում» ծրագրի շրջանակներում Ուրծաձոր գյուղական համայնքում տեղի ունեցավ կլոր սեղան «Կանայք և մասնակցային ժողովրդավարությունը տեղական ինքնակառավարման համակարգում» թեմայով, որին մանակցում էին համայնքի 23 ակտիվ կանայք:

Կլոր սեղանը նվիրված էր  ՄԱԿ-ի պաշտոնական օրացույցում ամրագրված Գյուղաբնակ կանանց միջազգային օրվան:

Կլոր սեղանի նպատակն էր քննարկել  կանանց  մասնակցությունը համայնքի զարգացման  գործընթացներին, խթանել  կանանց  մասնակցության ակտիվությունը, ինչպես նաև նախապատրաստել գյուղի ակտիվ կանանց ավագանու առաջիկա ընտրություններում առաջադրվելուն:

Ամփոփելով կլոր սեղանի արդյունքները՝ Քաղաքացիական նախաձեռնությունների Արարատի մարզային կենտրոնի ղեկավարը նշեց, որ Գյուղաբնակ կանանց օրը  հարմար առիթ է  անդրադառնալու նշված խնդիրներին, նկատի ունենալով գյուղի  կանանց դերը աղքատության և սովի դեմ պայքարում: Ակնհայտ է, որ ներկայիս ծանր սոցիալ-տնտեսական իրավիճակը   գյուղի կանանց  դարձնում է առավել խոցելի խումբ, ուստի նրանց   իրավունքները  լրացուցիչ պաշտպանության  կարիք ունեն և նրանց հնարավորությունների ընդլայնման ու ներուժի արդյունավետ օգտագործման  ուղղությամբ անհրաժեշտ է ձեռնարկել լրացուցիչ միջոցներ:

Ընդգծվեց, որ կանանց  հնարավորությունների ընդլայնմանն  ու ներուժի արդյունավետ օգտագործմանն  ուղղված  քայլերը ինքնանպատակ չեն, դրանք միտված են   նպաստելու  համայնքի բարօրությանն ու զարգացմանը: Հայ գյուղը վերածնունդ կապրի  միայն կանանց և տղամարդկանց միասնական աշխատանքով և ուժով: